బెంగళూరు తొక్కిసలాట ఘటన హృదయవిదారకం: ప్రధాని మోదీ

Updated on: 2025-06-04 21:16:00

బెంగళూరులో ఆర్సీబీ విజయోత్సవ వేడుకల్లో తొక్కిసలాట ఘటనలో 11 మంది అభిమానులు మృతి, 30 మందికి పైగా గాయాలు చిన్నస్వామి స్టేడియం వెలుపల చోటుచేసుకున్న దుర్ఘటన మృతుల కుటుంబాలకు ప్రధాని నరేంద్ర మోదీ ప్రగాఢ సంతాపం ఐపీఎల్ లో రాయల్ ఛాలెంజర్స్ బెంగళూరు (ఆర్సీబీ) జట్టు 18 ఏళ్ల సుదీర్ఘ నిరీక్షణ తర్వాత విజేతగా నిలవడంతో నగరంలో ఏర్పాటు చేసిన సంబరాలు తీవ్ర విషాదంగా మారాయి. బుధవారం చిన్నస్వామి స్టేడియం వెలుపల జరిగిన విజయోత్సవ కార్యక్రమంలో భారీగా అభిమానులు తరలిరావడంతో తొక్కిసలాట చోటుచేసుకుంది. ఈ దుర్ఘటనలో 11 మంది ప్రాణాలు కోల్పోగా, 30 మందికి పైగా గాయపడ్డారు. ఈ సంఘటనపై ప్రధానమంత్రి నరేంద్ర మోదీ తీవ్ర దిగ్భ్రాంతి వ్యక్తం చేశారు. "బెంగళూరులో జరిగిన దుర్ఘటన అత్యంత హృదయ విదారకమైనది. ఈ విషాద సమయంలో, తమ ఆప్తులను కోల్పోయిన వారందరికీ నా ప్రగాఢ సానుభూతి తెలియజేస్తున్నాను. గాయపడిన వారు త్వరగా కోలుకోవాలని ప్రార్థిస్తున్నాను" అంటూ మోదీ సందేశాన్ని ప్రధానమంత్రి కార్యాలయం (పీఎంఓ ఇండియా) ఎక్స్ లో పోస్ట్ చేసింది.