బొబ్బిలి పట్టణంలో ఇంట్లో విరగబూసిన బ్రహ్మ కమలాలు

Updated on: 2025-12-10 08:43:00

బ్రహ్మ కమలం పుష్పాలు అరుదుగా కనిపిస్తుంటాయి. ఏడాదికి ఒకసారి మాత్రమే ఈ పుష్పాలు పూస్తుంటాయి. బ్రహ్మ కమలం పుష్పానికి హిందూ సంప్రదాయంలో చాలా విశిష్టత ఉంది. హిమాలయాల్లో దొరికే ఈ అరుదైన మొక్కను చాలా తక్కువ మంది మాత్రమే పెంచుతుంటారు. అలాగే ఈ మొక్క ఇంట్లో ఉంటే ఎంతో మంచిదని అందరూ భావిస్తుంటారు. అద్భుతమైన వాసనతో ఉండే బ్రహ్మ కమలం అర్థరాత్రి సమయంలో వికసించి కొన్ని గంటలు మాత్రమే ఉండి వాడిపోతాయి. మామూలుగా బ్రహ్మకమలం ఒకటి పూస్తేనే జనం అద్భుతంగా చూస్తుంటారు. కానీ బొబ్బిలి పట్టణం పూల్ బాగ్ లో నివసిస్తున్న ఏ .లక్ష్మణరావు (విశ్రాంత ఉపాధ్యాయులు) ఇంట్లో పూసిన బ్రహ్మ కమలం పుష్పాలు చూపరులను ఆకట్టుకుంటున్నాయి. ఒక మొక్క నుంచి ఏకంగా 34 పుష్పాలు విరబూశాయి. లక్ష్మణరావు సంవత్సరం క్రితం ఇతర ప్రాంతం నుంచి ఈ మొక్కను తీసుకువచ్చారు. ఈ క్రమంలో ఈ మొక్క నుండి సుమారు 100పైగా బ్రహ్మ కమలం పుష్పాలు విరబూశాయి. చెట్టు నిండా పూసిన పూలు ఆకాశంలో నక్షత్రాలను తలపిస్తున్నాయి. ఈ అరుదైన దృశ్యాన్ని చూసేందుకు చుట్టుపక్కల జనం తరలివస్తున్నారు. వందకుపైగా పూసిన బ్రహ్మ కమలం పుష్పాలను ఇంటి యజమాని వేంకటేశ్వర స్వామి పూజకు ఉపయోగించారు.